UMURYANGO WACU

Abantu bashyira amahame yacu mu bikorwa

Muri Lucor Ltd, buri wese mu bagize umuryango wacu agira uruhare mu kuzuza amahame yo ku rwego rwo hejuru abakiliya bacu babonera mu kazi kacu ka buri munsi. Kuva ku bayobozi bakuru batanga icyerekezo n’ingamba, kugeza ku bagenzuzi bakurikirana ko imikorere ihoraho kandi ihwanye, ndetse n’abakozi bakora isuku ku buryo butaziguye bagatanga serivisi zinoze — buri wese afite uruhare rw’ingenzi mu musaruro wa Lucor mubona

Umuco wacu ushingiye ku cyubahiro, ubunyamwuga no guhora twiga kandi tunoza imikorere. Dushakira buri mukozi ubufasha bwose akeneye, tumuha agaciro kandi tumutera imbaraga zo gukoresha ubushobozi bwe no kugera ku ntego ze.

Iyo ubaye umwe mu banyamuryango ba Lucor, ntabwo uba winjiye muri sosiyete gusa — uba winjiye mu rugendo rwo kwimakaza umuco mushya w’ubunyamwuga. Hano, buri gikorwa gifite icyubahiro. Ubunebwe, ubujura no guteshuka ku mahame ntibigira umwanya na muto. Hano, ubunyangamugayo ni umwambaro wawe, ubudashyikirwa ni igipimo cyawe, kandi ishema ryo gukora neza ni ingororano yawe.

Abakozi bacu, ishema ryacu

Muri Lucor Ltd, twemera ko abakozi bafite umurava, bubahwa kandi bahabwa ubufasha bubafasha gukora kinyamwuga ari bo nkingi y’itangwa rya serivisi zinoze. Ni yo mpamvu dushora imbaraga mu guteza imbere no kubungabunga abakozi bacu binyuze muri ibi bikurikira:

Umushahara n'ibindi bigenerwa abakozi bikwiye kandi bitangwa ku gihe, bigaragaza icyubahiro n’agaciro duha umukozi n’umwuga we.
Amahugurwa ahoraho no kongera ubushobozi, hagamijwe guteza imbere ubumenyi, ubushobozi ndetse n’icyizere umukozi yigirira mu byo akora.
Ahakorerwa akazi hatekanye kandi hafite ibikoresho bikwiye, hubahiriza amahame y’Ubuzima n’Umutekano mu Kazi (Occupational Safety and Health – OSH), gukumira, gutahura, kurwanya no guhashya no guhashya ibyago bishobora kwirindwa, ndetse no gukumira kurwanya no guhashya ubwandu bw'indwara zandura (IPC).
Kumenya no gushima umusaruro mwiza n’imyitwarire ya kinyamwuga.
Umuco ushingiye ku cyubahiro, ikinyabupfura no gukorera hamwe.

Intego yacu ni ukuba ahantu buri wese ashakira abakozi bashinzwe ibikorwa by’ubufasha (supporting staffs) bafite umurava, ikinyabupfura n’ubunyamwuga biri ku rwego rwo hejuru mu Rwanda. Iyo abakozi bacu bateye imbere, abakiliya bacu na bo babona inyungu binyuze mu ireme rya serivisi ryisumbuye, kwizerwa no kubazwa inshingano muri buri serivisi dutanga.

Mu buyobozi (administration), mu bugenzuzi (supervision/coordination) cyangwa mu bikorwa bikorerwa ku murongo wa mbere (frontline operations) , abakozi bose ba Lucor bafite inshingano imwe: gutanga serivisi zizewe, zitanganywa icyubahiro kandi zujuje amahame yo ku rwego rwo hejuru hirya no hino mu Rwanda.

Abakiliya bacu bashobora gukenera abakozi batandukanye bashinzwe ibikorwa by’ubufasha (supporting staffs), bafite ubumenyi n’amashuri atandukanye, ndetse n’abayobozi b’amakipe (team leaders). Ohereza CV yawe kuri recruitment@lucor.co.rw kugira ngo tukumenyeshe igihe amahirwe yo kwinjira mu muryango wacu azaboneka aho utuye cyangwa hafi yawe.

Ubuyobozi Bukuru n’Itsinda ry’Abajyanama

Ubuyobozi Bukuru n’Itsinda ry’Abajyanama ba Lucor batanga urugero mu buyobozi binyuze mu bunyangamugayo, gukorera mu mucyo no gushyigikira mu buryo butaziguye abakozi bakorera ku murongo wa mbere.

Ubumenyi n’ubunararibonye byabo bihuriye hamwe bituma buri serivisi itegurwa, igashyirwa mu bikorwa kandi igasuzumwa kinyamwuga, bityo tugakomeza kubungabunga indangagaciro za Lucor n’izina n’icyizere by’ikigo dukorera.

REHP Romuald NIYOGISUBIZO
Umuyobozi Mukuru
📧 romuald@lucor.co.rw
📞 (+250) 788 478 418

🌐www.lucor.co.rw

Nk'Umuyobozi Mukuru wa Lucor Ltd, niyemeje guhora nsigasira icyizere ngirirwa binyuze mu bunyangamugayo, gukorera mu mucyo no kuyoborana ubupfura. Ducunga umutungo n’ibikoresho mu buryo bwita ku nshingano, tukubaha kandi tugaha abakozi bacu agaciro bakwiye, tugashyira imbere umusaruro n’inyungu by’abakiliya, tugakurikiza amahame akomeye y’imyitwarire myiza mu mwuga, kandi tugahora tunoza serivisi dutanga — byose hagamijwe kugera ku musaruro ugaragara kandi tukubaha ibigo dukorera n'ababigana.

Icyizere cyubakwa n’imyitwarire ndangabupfura ihamye, ubunyangamugayo budacogora, no kubazwa inshingano. Nk'Umuyobozi Mukuru wa Lucor Ltd, niyemeje ko buri cyemezo dufata kigaragaza imiyoborere iboneye kandi ishingiye ku ndangagaciro, ndetse no kubaha ibigo dukorera n'ababigana.

Isezerano ryanjye ririmo ibi bikurikira:

✅ Imikorere iboneye kandi ibonekera mu mucyo

Tuganira kandi dutanga amakuru mu buryo busobanutse, tugategura kandi tukabika inyandiko mu buryo bwita ku nshingano, kandi tukubahiriza ibisabwa mu itangwa ry’amasoko, amasezerano n’amategeko n’amabwiriza bitabaye ngombwa ko tugira inzira z’ibisesero cyangwa iz’ubusamo.

✅ Imicungire iboneye y’umutungo n’ibikoresho

Ubufasha, ibikoresho n’umutungo w’ikigo tuba twaragezeho cyangwa twarashinzwe kubungabunga, tubicunga kinyamwuga. Ntabwo tubipfusha ubusa, ntitubikoresha nabi cyangwa ngo tubikoreshe mu kugira uwo dushaka guhindurira icyemezo cyangwa imikorere hagamijwe kubona inyungu idakwiriye.

✅ Imikoreshereze y’abakozi iboneye kandi yubaha agaciro kabo

Abakozi bacu turabubaha, tukabishyura ku gihe, kandi tukabafasha guteza imbere ubushobozi bwabo binyuze mu mahugurwa n’ubugenzuzi bushingiye ku kinyabupfura n'indangagaciro zihamye, aho gushingira ku bwoba.

✅ Gushyira umukiliya ku isonga

Buri kigo dukorera kigomba kubona impinduka nziza zigaragara mu musaruro w’akazi, imikorere inoze n’uko serivisi zacyo zigaragara mu maso y’abakigana.

✅ Nta kwihanganira ruswa n'iyezandonke iryo ari ryo ryose

Ntidukora mu buryo bwo gutanga cyangwa kwakira ruswa, gutanga indonke cyangwa gushaka guhindura ibyemezo by’abandi dukoresheje amayeri cyangwa ubundi buryo butari ubwa kinyamwuga. Agaciro ka Lucor gashingiye ku musaruro dutanga no ku kwizerwa kwacu.

✅ Kubika ibanga no kugira ubushishozi

Turinda amakuru y’abakiliya, imikorere y’ibigo dukorera n’inyandiko z’imirimo y’imbere mu kigo, kandi tukabigira ibanga rikomeye uko bisabwa

✅ Gukomeza kunoza imikorere

Duhora dushaka uko twashyira mu bikorwa ibitekerezo n’ibyifuzo by’abakiliya, dusuzuma imikorere yacu kandi tugahora tunoza uburyo dukora kugira ngo duhuze serivisi zacu n’amahame agenda arushaho kuzamuka y’Ubuzima n’Umutekano mu Kazi (OSH), Gukumira, Gutahura, kurwanya no guhashya ibyago bishobora kwirindwa, ndetse no Gukumira no Kurwanya Ubwandu bw'Indwara Zandura (IPC) ku rwego rw’igihugu no ku rwego mpuzamahanga.

Imyumvire yanjye ku buyobozi iroroshye:

Kora ibikwiriye — n’iyo haba ntawe ukureba.

Icyizere si amagambo tuvuga; ni umuco wubakwa buri munsi.

Kuri Lucor, tukigarurira binyuze mu kinyabupfura, icyubahiro no mu musaruro ushobora gupimwa.

Google Sites